வரவிருக்கும் சட்டமன்ற தேர்தலை முன்னிட்டு சென்னை ராயபுரம் தொகுதியில் அரசியல் களம் சூடுபிடித்து வருகிறது. இத்தொகுதியில், திராவிட இஸ்லாமிய கழகத்தின் சார்பில் அதிரை மண்ணின் மைந்தர் நிசார் அகமது போட்டியிட உள்ளதாக அதிகாரப்பூர்வமாக அறிவிக்கப்பட்டுள்ளது.
நிசார் அகமது சமூகப்பணியில் ஆர்வம் கொண்டவராகப் பொதுமக்களிடையே நல்ல வரவேற்பைப் பெற்றவர். பல ஆண்டுகளாக கல்வி, சுகாதாரம் மற்றும் ஏழை எளிய மக்களுக்கு உதவும் பல்வேறு சேவைகளில் ஈடுபட்டு வருகிறார். அவரது சமூகப்பணிகள், குறிப்பாக இளைஞர்களை சமூக முன்னேற்றம் நோக்கி வழிநடத்தும் முயற்சிகள், அவருக்கு தனித்துவமான அடையாளத்தை உருவாக்கியுள்ளது.
திராவிட இஸ்லாமிய கழகத்தின் மாநில நிர்வாகியாகவும் செயல்பட்டு வரும் இவர், ஏகத்துவ சித்தாந்தத்தின் மீது கொண்ட நம்பிக்கையால் அரசியல் துறையில் முழுமையாக ஈடுபட்டார். அதன் பின்னர், பொதுமக்களின் நலனைக் கருத்தில் கொண்டு அரசியல் கட்சியை துவக்கி, பல்வேறு சமூக மற்றும் அரசியல் நடவடிக்கைகளை முன்னெடுத்து வருகிறார்.
மேலும், இந்த முறை நடைபெறும் சட்டமன்ற தேர்தலில் மொத்தம் 4 அதிரையர்கள் வெவ்வேறு தொகுதிகளில் போட்டியிடுகின்றனர் என்பது குறிப்பிடத்தக்கது. இதனால் அதிரை பகுதியைச் சேர்ந்தவர்களின் அரசியல் பங்கு அதிகரித்துள்ளதாகவும், இது ஒரு புதிய முன்னேற்றமாகவும் அரசியல் வட்டாரங்களில் பார்க்கப்படுகிறது.
ராயபுரம் தொகுதியில் அடிப்படை வசதிகள் மேம்பாடு, வேலைவாய்ப்பு உருவாக்கம், இளைஞர்களுக்கான திறன் மேம்பாட்டு திட்டங்கள் மற்றும் அனைவருக்கும் சமமான உரிமைகள் ஆகியவற்றை முன்னிலைப்படுத்தி தேர்தல் பிரசாரத்தை முன்னெடுக்க திட்டமிட்டுள்ளார்.
இந்த தேர்தலில் நிசார் அகமது போட்டியிடுவது, ராயபுரம் தொகுதியில் புதிய அரசியல் மாற்றத்தை உருவாக்குமா என்ற எதிர்பார்ப்பு பொதுமக்களிடையே எழுந்துள்ளது. அவரது சமூகப்பணிகளும், அரசியல் நோக்கங்களும் வாக்காளர்களை எவ்வாறு கவரும் என்பது தேர்தல் முடிவில் தெளிவாகும்.
