கருப்பையில் துவங்கும் துடிப்பு
காலமே நிறுத்தும் துடிப்பு
மருத்துவர் அறியும் துடிப்பு
மனிதனின் வாழ்க்கைத் துடிப்பு
குருதியின் ஓட்டம் துடிப்பு
கோபமும் காட்டும் துடிப்பு
சுருதியும் குறைந்தால் இழப்பு
சொல்வது இதயத் துடிப்பு
நேசமும் கண்டால் துடிப்பு
நெருங்கிடும் வேளை துடிப்பு
மோசமும் கண்டால் துடிப்பு
மொத்தமும் இழந்தால் துடிப்பு
மகிழ்ச்சியில் வேகத் துடிப்பு
மனம்நிறை நிதானத் துடிப்பு
நெகிழ்ச்சியில் ஓசைத் துடிப்பு
நிமிடமும் மாறும் துடிப்பு
தூங்கினால் சீராம் துடிப்பு
சோர்வினால் குறையும் துடிப்பு
தாங்கிடும் உயிரே துடிப்பு
சார்ந்துள மூச்சே துடிப்பு
ஆக்கம்:
கவியன்பன் கலாம்
